* ညီမလေးရေ
မြကန်သာမှာ
ကြာမျိုးစုံပွင့်သတဲ့။
* ညီမလေးရဲ့
ဘဝရဂုံသာကား
မြပုဏ္ဏမာ ငွေလဝန်း
ထွန်းတဲ့စမ်းရေအိုင်။
* လမသာ ရေမစီး
လွင်တီးကုန်း ကန္တာမြေ
နတ်တို့ပင် ဖွေသော်လည်း
ရွှေကြာတို့ မပေါက်ရောက်ရာ။
* တောကြီးမာယာ
မဟာဂနိုင်ကား
သူယောင်တို့ ပြုစားရာ။
* မြို့ကြီးမာယာ
ဝင်္ကန္တာကား
အသူတရာတည့်။
* မိစ္ဆာစိုးမိုး
ခိုးသူတို့နေရာ
အမိမြန်မာကား
ကာလဒုက္ခတည့်။
* ညီမလေးရေ
ကသစ်ပန်းဆိုတာ
နတ်တို့ရဲ့စခန်းမှာသာ
ပွင့်လန်းရမြဲ ဓမ္မတာပါ။
* သူပုန်မည်သည်
ရဂုံပြည်မှာ တင့်တယ်သလို
အနုပညာသည်ရဲ့အလှ
ဘဝ သဏ္ဍာန် သမုဒယ
သုခုမ လမ်းမှာသာ
အစွမ်းတန်ခိုး ပီဘိ
အဓိပ္ပာယ်ရှိတဲ့အဖြစ်
ထုဆစ် သည်ပိုးရသည်ကော။
* ငါကား
အနုပညာကို မြတ်နိုး
အနုပညာ အမျိုးနွယ်ကို
အနုပညာ နယ်ပယ်မှာသာ
တင့်တယ်စေလိုသူတည်း။
* ညီမလေးရေ
ပရိယေသန သက်သက်မဟုတ်ပါ
တရားပျက်
အမှားဖက်
အမိုက်တွင်းနက်
ယွင်းပျက်တဲ့ ခေတ်ကာလ
ဖြစ်လာရတဲ့ လူ့တဘဝ
သုခုမ ပညာသည်ခရီး
မီးအိမ်လေးတလုံး။
* အမိုက်ကို
တိုက်ခိုက် အံတုမှုသည်ပင်
အကြင်အဖိုးဖြတ်မရသည့်
ဘဝ၏ အနှစ်သာရပေပ။
* တိုက်ပွဲထဲမှာ
အမိုက်ကို ရဲရဲအာခံ
မြန်မာပြည် တော်လှန်ရေး
သွေးတွေစီးဆင်းဆဲ
အကျဉ်းနရသိန်လည်း
သူရဲကောင်းတို့အိမ်ဖြစ်ဆဲ
ဘဝကို စွန့်မြဲစွန့်ခဲ့ရ
ကျဆုံးသွားသူအပေါင်း
အထောင်အသောင်းလည်း
မောင်းမောင်းချီတက်ကြဆဲကို။
* ရှစ်လေးလုံးသစ္စာ
အသက်နဲ့ခန္ဓာ …
ကမ္ဘာမကြေဘူး …
အထူးထူးသော အရိပ်တွင်
ရှင်သန်သည်မှ
ဘဝ၏ ကုံလုံဖွယ်
အဘယ်မည်သော
လောဘ၊ ဒေါသ၊ မောဟများဖြင့်
ပွားစည်းကုန်ဆုံးစေပါအံ့။
* ညီမလေးရဲ့
အနုပညာနှင့် ဘဝ
ထပ်တူထပ်မျှ
အသက်ရှိသမျှ
လောကအကျိုးကို ဆောင်
အောင်မြင်ခြင်းလမ်းမှာ
မားမားမတ်မတ်
ရပ်တည် ရှင်သန်နေပါဘိ။
* ငြိမ်းချမ်းခြင်း ဆည်းလည်းသံ
ညင်းညင်းညံတဲ့အခါ
ပညာ ဓမ္မနဲ့
လောကကို ဆောင်တဲ့အခါ
ဗြဟ္မစိုရ်တရား
ထင်ရှားတည်တံ့တဲ့အခါ
လွတ်လပ်ရေး စည်ကြီး
မြည်ဟည်းတဲ့အခါ
လူငယ်တို့ဘုန်း
မိုးသို့ချုန်းတဲ့အခါ
ငါတို့ရဲ့ ကသစ်ပန်း
ငါတို့အစွမ်းအစနဲ့
တူးဆွစိုက်ပျိုး
မညှိုးမနွမ်း ထာဝစဉ်
နန္ဒဝန် ဥယျာဉ်
တီထွင်ရမှာပ။
* ညီမလေးရဲ့
ဘဝရဂုံသာကား
မြပုဏ္ဏမာ ငွေစန်း
အေးချမ်းတဲ့ အလင်းကိုလှုံ
ဖူးငုံရာက လျှမ်းလျှမ်း
စပယ်ပွင့်ဆန်း၍ လန်း၍။ ။
စောငို
ဇန်နဝါရီ ၂၄၊ ၂ဝဝ၉
ဒင်းဗား
No comments:
Post a Comment