ကဗျာဟာ လူသားတွေကို အညီအညွတ်ဖြစ်အောင် ဖန်တီးနိုင်တဲ့ စွမ်းပကားကြီးတခု ဖြစ်ပါတယ်။
သူ့မှာ ဒေသ နယ်နမိတ်သော်လည်းကောင်း၊ ကာလ နယ်နမိတ်သော်လည်းကောင်း မရှိပါဘူး။
ထောင်ဝတ်စုံ အပြာရောင် ရှပ်အင်္ကျီကို ဝတ်လေ့ရှိတဲ့ ဦးဝင်းတင်ဟာ သူရင်ဆိုင်ခဲ့ရတဲ့ အစစ်အဆေး အမေးအမြန်း ဒဏ်တွေကို ခံနိုင်ရည်ရှိဖို့အတွက် Henley ရဲ့ (Invictus) ကဗျာကို အားကိုးခဲ့ပါတယ်။
ဒီကဗျာဟာ လွတ်လပ်ရေး တိုက်ပွဲ ကာလအတွင်းထဲတုန်းက ကျွန်မရဲ့ဖခင်နဲ့ သူတို့ခေတ် ခေါင်းဆောင်တွေကို စိတ်ဓာတ်အင်အား ဖြည့်တင်းပေးခဲ့ပါတယ်။ အလားတူစွာပဲ ဒီကဗျာဟာ တခြားခေတ်တွေမှာ တခြားနိုင်ငံတွေမှာ လွတ်လပ်ရေး တိုက်ပွဲဝင်သူတွေကိုလည်း စိတ်ဓာတ်အင်အား ဖြည့်တင်းပေးခဲ့တဲ့ လက္ခဏာ ရှိပါတယ်။
‘တိုက်ပွဲဝင်ခြင်းနဲ့ ပင်ပန်းဆင်းရဲခြင်း၊ သွေးသံရဲရဲကျလျက်နဲ့ ဦးခေါင်းမညွတ်ခြင်း၊ အသက်ပင်လျှင် သေဆုံးရခြင်း၊ ဒါတွေ အားလုံးဟာ လွတ်လပ်မှုအတွက် ဖြစ်ပါတယ်’
လွတ်လပ်မှုဆိုတဲ့စကားလုံးကို ဘယ်လို နားလည်ပါသလဲလို့ သူတို့ကို ရှင်းပြခိုင်းမယ်ဆိုခဲ့လို့ရှိရင် နိုင်ငံရေး အကျဉ်းသားတွေရှိတော့မှာ မဟုတ်တာတို့၊ သို့မဟုတ် လွတ်လပ်စွာ ပြောဆိုခွင့်၊ သတင်း လွတ်လပ်ခွင့်နဲ့ လွတ်လပ်စွာ စည်းရုံးခွင့် ရှိလာမှာတို့၊ သို့မဟုတ် ကျွန်မတို့ဟာ ကျွန်မတို့လိုချင်တဲ့ အစိုးရမျိုးကို ရွေးချယ်နိုင်တယ်တို့၊ သို့မဟုတ် ရိုးရိုးကလေးပဲ သိမ်းကျုံးပြီးတော့ ကျွန်မတို့ဟာ ကျွန်မတို့လုပ်ချင်တာကို လုပ်နိုင်မယ်တို့ စသဖြင့် အဲဒီလို သူတို့ရဲ့ရင်ထဲမှာ အရှိဆုံး စိတ်ဝင်စားမှုတွေကို သူတို့ တသီကြီး ထုတ်ပြောဖွယ်ရာ အများဆုံး ရှိပါတယ်။
ဒီလို အပြောအဆိုဟာ အတွေးအမြင် ရိုးစင်းလွန်တဲ့ လေသံပေါက်နိုင်ပါတယ်။ ဆိုးကျိုးဖြစ်မလား မပြောတတ်အောင် ရိုးစင်းလွန်းတဲ့လေသံ ပေါက်နိုင်ပါတယ်။
ဒါပေမယ့် ဒီလို အပြောအဆိုတွေမှာ တွေ့မြင်ရတဲ့အချက်က လွတ်လပ်မှုဆိုတာ ဒဿနိကဗေဒအမြင်နဲ့ အငြင်းအခုန် ပြုပြီး ဖော်ထုတ်ရတဲ့ အယူအဆ တခုမျှသာမဟုတ် လက်တွေ့အလုပ်လုပ်ကိုင်ပြီး ရအောင်ယူရတဲ့ လက်ဆုပ်လက်ကိုင် မြင်နိုင်တဲ့အရာဖြစ်တယ်ဆိုတဲ့ နားလည်ပုံ နားလည်နည်း ဖြစ်ပါတယ်။
ကျွန်မ နေအိမ်အကျယ်ချုပ်နဲ့ ထိန်းသိမ်းခံရတဲ့ အချိန်ကာလအသီးသီးရဲ့အဆုံးမှာ အကျယ်ချုပ်က လွတ်လာတဲ့အတွက် ဘယ်လို ခံစားရပါသလဲလို့ ကျွန်မကို မေးကြတဲ့အခါတိုင်း ဘယ်လိုမှ ထူးထူးခြားခြား မခံစားမိပါဘူး၊ ဘာဖြစ်လို့လဲဆိုတော့ ကျွန်မရဲ့စိတ်ဟာ အစဉ်အမြဲ လွတ်လပ်နေခဲ့လို့ ဖြစ်ပါတယ်လို့ ကျွန်မ ဖြေလေ့ရှိပါတယ်။
ကိုယ့်ရဲ့ အမှားအမှန် ဆင်ခြင်ဉာဏ်နဲ့ ညီညွတ်တဲ့ လမ်းကြောင်းကို လျှောက်ခြင်းအားဖြင့် ရရှိတဲ့အတွင်းစိတ်ဓာတ် လွတ်လပ်မှုအကြောင်းကို ကျွန်မ မကြာခဏ ပြောခဲ့ပါတယ်။
Isaiah Berlin ကတော့ လွတ်လပ်မှုကို အတွင်းစိတ်ဓလေ့ဖြစ်စေခြင်းအားဖြင့် ပေါ်ပေါက်နိုင်တဲ့ ဆိုးကျိုးတွေကို သတိပေးခဲ့ပါတယ်။ သူက ဒီလို ဆိုပါတယ်။
‘စိတ်ဓာတ်အားဖြင့် လွတ်လပ်မှုကို ရှုမြင်ရာ၌ အလားတူစွာပင် ကိုယ်ကျင့်သီလအားဖြင့် အောင်နိုင်မှုကို ရှုမြင်ရာ၌ လွတ်လပ်မှုအပေါ်တွင် ပိုမို၍ အခြေခံကျသော နားလည်ပုံ၊ နားလည်နည်း၊ အောင်နိုင်မှုအပေါ်တွင် ပိုမို၍ သာမန် အမြင်ရှိသော နားလည်ပုံ နားလည်နည်းတို့နဲ့ ခွဲခြား၍ ရှုမြင်ရပေမည်။ သို့မဟုတ်ပါက လွတ်လပ်ခွင့်တည်း ဟူသော အမည်ကို သုံးစွဲလျက် သဘောတရားအားဖြင့် အမြင်ရှုတ်ထွေးမှု အန္တရာယ်ကို လည်းကောင်း၊ လက်တွေ့အားဖြင့် ဖိနှိပ်မှု တရားသည် ဟူသော အဆုံးအဖြတ် အန္တရာယ်ကိုလည်းကောင်း ကြုံတွေ့ရပေလိမ့်မည်’ တဲ့။
တခြား လွတ်လပ်မှုအားလုံးရဲ့နေရာမှာ စိတ်ဓာတ်အားဖြင့် လွတ်လပ်မှုကို အစားထိုးမယ်ဆိုရင် ကျေနပ်ဖွယ်ရာ ရှိပါတယ်လို့ လက်ခံခြင်းဟာ ဘာမှ မလုပ်မကိုင်ဘဲ နေခြင်းနဲ့ အရှုံးပေး အညံ့ခံခြင်း စခန်းကိုဆိုက်အောင် ပို့နိုင်တဲ့ အန္တရာယ်ရှိတာ အမှန် ဖြစ်ပါတယ်။
ဒါပေမယ့် အတွင်းစိတ်ဓာတ်အားဖြင့် လွတ်လပ်မှုကို နားလည်ပုံ နားလည်နည်းဟာ လူ့အခွင့်အရေးနဲ့ တရား ဥပဒေ စိုးမိုးရေး ဆိုတဲ့ အားထုတ်မှုကို အင်အား ဖြည့်တင်းပေးနိုင်ပါတယ်။
ဗုဒ္ဓအယူဝါဒက အဆုံးစွန်လွတ်မြောက်ခြင်းဟာ လိုချင်မှု မှန်သမျှက လွတ်မြောက်ခြင်းဖြစ်တယ် လို့ ဆုံးမပါတယ်။ အဲဒီတော့ ဗုဒ္ဓရဲ့အဆုံးအမဟာ လူ့အခွင့်အရေးနဲ့ နိုင်ငံရေး ပြုပြင်ပြောင်းလဲမှုရှိစေမယ့် လွတ်လပ်မှုကို လိုချင်ခြင်း အခြေခံတဲ့ လူထုလှုပ်ရှားမှုတွေနဲ့ သဟဇာတ မဖြစ်ဖူးလို့ စောဒကတက်တာ ရှိနိုင်ပါတယ်။
ဒါပေမယ့် ၂ဝဝ၇ ခုနှစ်မှာ မြန်မာနိုင်ငံက ဗုဒ္ဓဘာသာ ရဟန်း သံဃာတော်များဟာ မေတ္တာပို့ ချီတက်ပွဲ ဆင်နွှဲကြစဉ်တုန်းက သူတို့ဟာ စားကုန်သောက်ကုန် ဈေးနှုန်းတွေ အကြီးအကျယ် မြင့်တက်ကုန်အောင် ဖန်တီးခဲ့တဲ့ လောင်စာဈေးနှုန်း ရုတ်တရက် တအားကြီး မြှင့်တင်မှုကို ကန့်ကွက် ဆန္ဒပြခဲ့ကြတာ ဖြစ်ပါတယ်။
သူတို့ဟာ လူထုကြီးမှာ လက်လှမ်းမီတဲ့ စားကုန်သောက်ကုန် ပြည့်စုံခြင်းဆိုတဲ့ အခြေခံအခွင့်အရေးရရှိဖို့အတွက် ဘာသာရေး သြဇာအရှိန်အဝါကို သုံးစွဲပြီး အရေးဆိုခဲ့ကြတာ ဖြစ်ပါတယ်။
စိတ်ဓာတ်အားဖြင့် လွတ်လပ်မှုကို အယုံအကြည် ရှိတာနဲ့ပဲ၊ လူသတ္တဝါတွဟော လူသတ္တဝါနဲ့တူအောင် နေနိုင် ထိုင်နိုင်ဖို့ရာမှာ မရှိမဖြစ်ဖူးလို့ အများတကာ ရှုမြင်ကြတဲ့ အခြေခံအခွင့်အရေးနဲ့ လွတ်လပ်မှုတွေအတွက် လက်တွေ့ လိုအပ်ချက်ကို ဂရုမစိုက်ဘဲနေလိုက်ရမယ် မဟုတ်ပါဘူး။
ကျွန်မ အင်မတန် တန်ဖိုးထားတဲ့ အခြေခံလူ့အခွင့်အရေးတခုကတော့ ကြောက်ရွံ့စိတ်က လွတ်လပ်ရေး ဖြစ်ပါတယ်။
မြန်မာနိုင်ငံမှာ ဒီမိုကရေစီ လှုပ်ရှားမှုကို စတင်လျှင် စတင်ချင်းအချိန်ကစလို့ ကျွန်မတို့ရဲ့ လူ့ဘောင်အဖွဲ့အစည်းတခုလုံးမှာ ပြန့်ပွားနေတဲ့ အားယုတ်စေလှတဲ့ ကြောက်ရွံ့စိတ်ကို ကျွန်မတို့ ရင်ဆိုင်ခဲ့ကြရပါတယ်။
မြန်မာနိုင်ငံကို အလည်အပတ် ရောက်လာသူတွေက မြန်မာတွေဟာ ဖော်ရွေတယ်၊ ဧည့်ဝတ်ကျေတယ်ရယ်လို့ ချက်ခြင်း ပြောတတ်ကြပါတယ်။ သူတို့ ပြောတတ်ကြသေးတဲ့ ဝမ်းနည်းဖွယ်ရာ စကားတခွန်းက မြန်မာတွေဟာ များသောအားဖြင့် နိုင်ငံရေးပြဿနာတွေကို ဆွေးနွေးဖို့ ကြောက်တတ်ကြတယ်ဆိုတဲ့ စကားပါပဲ။
ကျွန်မတို့ဟာ လွတ်လပ်မှုအတွက် တိုက်ပွဲဝင်ကြပြီဆိုတဲ့အခါမှာ ကြောက်ရွံ့စိတ်ဟာ လွတ်အောင်ရှောင်ရမယ့် ပထမဦးဆုံး ရန်သူ ဖြစ်ပါတယ်။ နောက်ပြီး မကြာခဏဖြစ်တတ်တာက ဒီရန်သူဟာ ခရီးလမ်းဆုံးကို ရောက်တဲ့အထိ ရှိနေတတ်တဲ့ ရန်သူ ဖြစ်ပါတယ်။
ဒါပေမယ့် ကြောက်ရွံ့စိတ်က လွတ်လပ်ခြင်းဟာ ရာနှုန်းပြည့် ဖြစ်ရမယ် မဟုတ်ပါဘူး။ တိုက်ပွဲကို ဆက်လက်ပြီး ဆင်နွှဲနိုင်ဖို့ရာ အလုံအလောက် ဖြစ်ဖို့သာ လိုပါတယ်။ နောက်ပြီး ကြောက်ရွံ့စိတ်ရှိတဲ့အထဲက တိုက်ပွဲကို ဆက်လက် ဆင်နွှဲဖို့ဆိုတာ ရဲစွမ်းသတ်တိ ကြီးကြီးမားမား လိုပါတယ်။
‘မဟုတ်ပါ။ ကျွန်မ မကြောက်ပါ။ ဤထောင်တွင်း အကျဉ်းကျညများတွင် တနှစ် အသက်ရှင်ပြီးနောက် သူ့ကို အမည်တပ်ခြင်းကပင်လျှင် ထွက်ပြေးခြင်းဖြစ်သည့် ဝမ်းနည်းကြေကွဲခြင်း လောကထဲသို့ ကျွန်မ ထွက်ပြေးပါမည်။ မမှန်ပါ။ ကျွန်မ ကြောက်ပါသည်။ သို့ပေမယ့် ရှင်တို့ သတိမပြုမိသကဲ့သို့ အသွင်ပေါက်စေလိုက်ပါ’ တဲ့။
Ratushinskaya ရဲ့ အဲဒီ စာကြောင်းတွေမှာ ဖော်ထုတ်တဲ့ ရဲရင့်ခြင်းဟာ အစိုးရ ဝေဖန်သူတွေအဖို့ နေ့စဉ် အတွေ့အကြုံ ဖြစ်ပါတယ်။ သူတို့ဟာ သူတို့ရဲ့တာဝန်တွေကို ဆောင်ရွက်နေတဲ့အခါမှာ မကြောက်တဲ့ဟန်ကို ဆောင်ပါတယ်။ သူတို့ရဲ့ ရဲဘော်ရဲဘက်တွေလည်းပဲ ဟန်ဆောင်နေကြတယ်ဆိုတာကို မမြင်တဲ့ဟန် ဆောင်ပါတယ်။
ဒါဟာ အတွင်းတမျိုး အပြင်တမျိုး အမူအရာ မဟုတ်ပါဘူး။
ဒါဟာ တနေ့ပြီးတနေ့ တချိန်ပြီးတချိန် အသိစိတ်ဓာတ်ရှိရှိနဲ့ထပ်ကာ ထပ်ကာ မွေးမြူနေရတဲ့ သတ္တိစိတ် ဖြစ်ပါတယ်။
ဒါဟာ ရက်စက်ကြမ်းကြုတ်ခြင်းနဲ့ မတရား မမျှတခြင်းက ဖန်တီးလိုက်လို့ ဖြစ်ပေါ်လာတဲ့ ကြောက်ရွံ့စိတ်ကနေပြီး လွတ်လပ်ပိုင်ခွင့်ကို ကျွန်မတို့ရတဲ့အချိန်ရောက်တဲ့အထိ လွတ်လပ်မှုတိုက်ပွဲကို ဆင်နွှဲရမယ့်ပုံစံ ဖြစ်ပါတယ်။
Akhmatova နဲ့ Ratushinskaya တို့ဟာ Russian လူမျိုးတွေပေါ့။ Henley က အင်္ဂလိပ် လူမျိုးပါ။ ဒါပေမယ့် ဖိနှိပ်မှု အောက်မှာ ရပ်တည်နိုင်ဖို့ တိုက်ပွဲဝင်ခြင်းနဲ့ ကိုယ့်ကမ္ဘာရဲ့ အရှင်သခင် ကိုယ့်ဝိဉာဉ်ရဲ့ ဦးစီးပဲ့ကိုင် ကိုယ်တိုင်ဖြစ်ဖို့ စိတ်ဓာတ်ပြင်းထန်ခြင်းဆိုတာ တွေကတော့ လူမျိုးအားလုံးမှာ တွေ့မြင်ရတဲ့ အခြင်းအရာ ဖြစ်ပါတယ်။
ဆက်လက်ဖော်ပြပါမယ်။
သရုပ်ဖော် ကောက်ကြောင်းပန်းချီ - မင်းကျော်ခိုင်
No comments:
Post a Comment