မြန်မာနိုင်ငံမှာ အပြုသဘောဆောင်တဲ့ နိုင်ငံရေး အပြောင်းအလဲ ဖြစ်လာမယ့် အရိပ်လက္ခဏာတွေ ရှိလာနေပြီ ဖြစ်တယ်လို့ ဒီမိုကရေစီခေါင်းဆောင် ဒေါ်အောင်ဆန်းစုကြည်က AFP သတင်းဌာနနဲ့ ဒီကနေ့ တွေ့ဆုံ မေးမြန်းခန်းမှာ ထုတ်ဖော်ပြောကြားလိုက်ပါတယ်။
မြန်မာပြည်သူတွေအတွက် တကယ့် လွတ်လပ်မှုကတော့ အလှမ်းဝေးနေဆဲ ဖြစ်တယ်လို့လည်း ထည့်သွင်းပြောသွားပါတယ်။
အခု အစိုးရသစ်လုပ်နေတဲ့ ဒီမိုကရေစီရေး ရှေးရှုတဲ့ ကြိုးပမ်းမှုတွေဟာ တကယ့် စစ်မှန်တဲ့ ကြိုးပမ်းမှုတွေလို့ သူ့အနေနဲ့ ယုံကြည်တယ်လို့လည်း ဒေါ်အောင်ဆန်းစုကြည်က ပြောပါတယ်။
ပြီးခဲ့တဲ့လက သမ္မတ ဦးသိန်းစိန်နဲ့ တွေ့ဆုံ ဆွေးနွေးခဲ့တုန်းက နိုင်ငံအတွက် လိုချင်တဲ့ သဘောတူချက် အတော်များများကို ရခဲ့တယ်လို့ ဒေါ်အောင်ဆန်းစုကြည်က AFP နဲ့ တွေ့ဆုံမေးမြန်းခန်းမှာ ထုတ်ဖော်ပြောသွားပါတယ်။
ဒေါ်အောင်ဆန်းစုကြည်က အပြုသဘောဆောင်တဲ့ အပြောင်းအလဲတွေလုပ်ဖို့ သမ္မတ ဦးသိန်းစိန်က လိုလားတယ် ဆိုတာကို ယုံကြည်ပေမယ့် ဘယ်လောက်လုပ်နိုင်မလဲဆိုတာကို စောင့်ကြည့်ရအုံးမယ်လို့ ပြောပါတယ်။
အာရပ်နိုင်ငံတွေမှာ ဖြစ်ခဲ့တဲ့ ဒီမိုကရေစီရေး လူထုအုံကြွမှုတွေ ပုံစံမျိုး မြန်မာနိုင်ငံမှာ ဖြစ်လာမှာကို သူ ဆန့်ကျင်တယ်လို့လည်း ဒေါ်အောင်ဆန်းစုကြည်က အလေးအနက် ပြောကြားသွားပါတယ်။
မြန်မာနိုင်ငံမှာ အပြောင်းအလဲ ဖြစ်လာနိုင်မယ့် အခြေအနေမျိုး ရောက်နေပြီဆိုတာကို ပြီးခဲ့တဲ့ ရက်ပိုင်းက ဒီမိုကရေစီနေ့ အခမ်းအနား မိန့်ခွန်းမှာလည်း ဒေါ်အောင်ဆန်းစုကြည်က ပြောသွားခဲ့ပေမယ့် ဘာကို အခြေခံပြောတာလဲဆိုတာကိုတော့ တိတိကျကျ ထုတ်ဖော်ပြောမသွားခဲ့ပါဘူး။
ဒေါ်အောင်ဆန်းစုကြည်အနေနဲ့ အခုလို ထုတ်မပြောသေးတာဟာ အချိန်မကျသေးလို့ဖြစ်တယ်လို့ NLD အမျိုးသားဒီမိုကရေစီအဖွဲ့ချုပ် ပြောခွင့်ရပုဂ္ဂိုလ် ဦးဉာဏ်ဝင်းက ဘီဘီစီကို ပြောပါတယ်။
အခုအခါ တဖက်နဲ့တဖက် တွေ့ဆုံစကားပြောလာတာဟာ ငြိမ်းချမ်းတဲ့နည်းနဲ့ အပြောင်းအလဲတွေ လုပ်လာတာ ဖြစ်တယ်လို့လည်း ဦးဉာဏ်ဝင်းက သုံးသပ် ပြောဆိုသွားခဲ့ပါတယ်။
သတင်း - ဘီဘီစီ
Photos : Getty Images
No comments:
Post a Comment