ကျနော် ပြုံးချင်သလိုလို ဖြစ်သွားမိတယ်။ ပဲခူးရိုးမမှာ ဖြစ်ခဲ့ကြတဲ့အကြောင်းချင်းတတွေ သိထားပြီးမို့ပါ။ ရည်းစားလုဘက် နှစ်ယောက် ဒီနေရာမှာတော့ တလှေထဲစီး တခရီးတည်း သွားနေကြပါလား။
(၄)
နံနက် လက်ဖက်ရည်သောက်ပြီးတာနဲ့ ရဲဘော်တွေ ဝိုင်းဖွဲ့လိုက်ကြပါတယ်။ ကျနော်က လာခေါ်လို့ တွေ့ဖြစ်ကြရင် ဘယ်လိုရင်ဆိုင်မယ်၊ ဘာတွေ … ဘာတွေ ပြောမယ်။ ညနေ ပြန်မရောက်လာရင် အဲဒါတွေပြောလို့ပဲဆိုတာ မှတ်ထားကြပါ … လို့ မှာထားပါတယ်။
တွက်ထားတဲ့အတိုင်း နံနက်စာစားပြီးချိန် လာခေါ်ပါတယ်။ အင်းစိန်ထောင်ကို ကျနော် မကျွမ်းပါ၊ စောင်ကလည်း အုပ်ထားလေတော့ ဘယ်ခေါ်သွားလို့ ခေါ်သွားတယ်မသိ။ စောင်ဖွင့်ပေးလိုက်မှ တထပ်တိုက်ကလေးရှေ့ တံခါးဝမှာရောက်နေကြောင်း သတိပြုမိတော့တယ်။
အပေါက်ဝဘေး ပုဏ္ဏားကွယ်အခန်းရှိ စားပွဲတလုံးဘေးမှာ လူနှစ်ယောက် ထိုင်နေပါတယ်။ (MI တွေပဲ ဖြစ်မယ်) စားပွဲပေါ်မှာ ဘာပစ္စည်း တင်ထားတယ် မသိ။ ကဒ်ထူပြားတချပ်ထောင်ပြီး ကွယ်ထားပါတယ်။ (နောက်မှ သိရတာက အသံဖမ်း ရီကော်ဒါ တင်ထားတာဆိုပဲ)
အခန်းထဲဝင်လိုက်တော့ အပြုံးကိုယ်စီနဲ့ လူနှစ်ယောက် မတ်တပ်ရပ်ကြိုနေပါတယ်။ ဘယ်ဘက် စားပွဲဘေးမှာ ရပ်နေသူကို (မတွေ့ဖူးပေမယ့်) မြင်မြင်ချင်း သိလိုက်ပါတယ်။ ဘခက်ပဲ။ တခြား စားပွဲတလုံးမှာတော့ (ကြည့်ရတာ) ပီကင်းပြန် တင်ရှိန်ပဲ ဖြစ်လောက်တယ်။
ကွာခြားချက်ကတော့ ဘခက်က ဘီလူးမျက်နှာနဲ့မောက်မာပြီး လူရည်လည်တဲ့ပုံ၊ တင်ရှိန်ကျတော့ မျက်နှာ မထားတတ်တဲ့ ပုံ။ သိပ်တက်တက်ကြွကြွ မရှိ၊ မတတ်သာလို့ ဟန်ဆောင်ပြုံးနေပုံ ရတယ်။
“ကျနော်က ရဲဘော် ဘခက်၊ သူက ပီကင်းပြန် ဗိုလ်တင်ရှိန်ပါ”
ကျနော် ပြုံးချင်သလိုလို ဖြစ်သွားမိတယ်။ ပဲခူးရိုးမမှာ ဖြစ်ခဲ့ကြတဲ့အကြောင်းချင်းတတွေ သိထားပြီးမို့ပါ။ ရည်းစားလုဘက် နှစ်ယောက် ဒီနေရာမှာတော့ တလှေထဲစီး တခရီးတည်း သွားနေကြပါလား။
ဘခက်က အင်မတန်မှ လှိုက်လှဲတဲ့ပုံစံနဲ့ လက်ဆွဲနှုတ်ဆက်ဖို့ လက်ကမ်းလာပါတယ်။ ကျနော်က ကပြာကယာ လက်နှစ်ဖက် နောက်ပစ်ထားလိုက်တယ်။ သူကလည်း လူပါး အခြေအနေကို တမဟုတ်ချင်း ပြန်ထိန်း လိုက်တဲ့အနေနဲ့ …
“ ကဲ ထိုင်ဗျို့၊ နားဦးဗျာ … ဖြည်းဖြည်းချင်း ပြောကြတာပေါ့” လို့ ပြောပါတယ်။
“ ကဲ ဆေးလိပ်သောက်ဗျာ ” (ကျနော် မသောက်တတ်ဘူး)
“ ကွမ်းရော ” (မစားပါဘူး)
“ဒီလိုဆို လက်ဖက်ရည်သောက် … မုန့်စားပေါ့” (သြော် … ခက်ပါပြီ၊ ခင်ဗျားတို့ ကျွေးတာမွေးတာ စားဖို့သောက်ဖို့ အစကတည်းက သဘောထား မရှိဘူးဗျ)
သူ ကျွဲမြီးတိုသွားဟန် ရှိပါတယ်။
“ရပါတယ်၊ ရပါတယ်”ပြောပြီး ခေါင်းတညိတ်ညိတ် လုပ်နေပါတယ်။ ကျနော့်ရဲ့ ပထမ ထိုးစစ် ထိရောက်သွားပုံပဲ။
တခဏတော့ အရာအားလုံး တိတ်ဆိတ် ငြိမ်သက်သွားခဲ့တယ်။ နောက်တော့မှ “ဒီလိုဗျာ … ခင်ဗျား အကိုနဲ့ အပြင်မှာ ခဏခဏ ဆုံဖြစ်ကြတယ်။ သူက ဒီတခေါက် လူတွေအများ ကြီးလွတ်လာပေမယ့် ကျုပ်ညီပါမလာဘူး၊ ကြည့်လည်း လုပ်ပေးပါဦးဗျာ … ပြောတာနဲ့ ခင်ဗျားကို ဦးစားပေး ခေါ်တာပါ” တဲ့။ (အပြင်ရောက်လို့ အကိုဖြစ်သူ ကို မေးကြည့်တော့ “ဟ ဒီကောင်နဲ့ငါက ကမ္ဘာရန်ပဲကွ၊ တွေ့ပါ့မလား” လို့ ဖြေပါတယ်။)
ကျနော်က “ဟုတ်ရဲ့လားဗျ” လို့ တုံ့ပြန်လိုက်တော့ သူ့အသံ တော်တော်နဲ့ ထွက်မလာ။ နောက်မှ …
“ဒီနေ့ ကိုမြ ပါမလာဘူး၊ အလင်းရောက် ရဲဘော်တယောက် အိမ်နေရာချထားဖို့ မင်္ဂလာဒုံဘက် သွားနေရတယ်။ သူပါမှ ဆွေးနွေးချင်တယ်ဆိုလည်း ရတယ်၊ မနက်ဖန် ရွှေ့လိုက်ကြတာပေါ့” လို့ ပြောထွက်လာတယ်။
“ကိစ္စမရှိပါဘူး၊ ခင်ဗျားတို့ ၃ ယောက်စလုံးနဲ့ ကျနော်နဲ့က ဘယ်တုန်းကမှသိခဲ့ဖူးကြတာ မဟုတ်ဘူး။ ဘယ်သူပါမှ မပါမှ ဆွေးနွေးချင်တယ်ဆိုတာမျိုး မရှိဘူး။ ကျနော့်ဘက်က တောင်းဆိုချင်တာတခုပဲ ရှိတယ်။ အစာငတ်ခံ တိုက်ပွဲဒဏ်ကြောင့် ကျနော့်မှတ်ဉာဏ်တွေ သိပ်မကောင်းဘူး။ ဖြတ်ပြောရဦးမယ်၊ ခင်ဗျားတို့ပြောတာပဲ နားထောင်ရမလား။ ကျနော်က ပြန်ပြောနိုင်ခွင့်ရှိသလား၊ သိချင်တယ်”
“ဟာ … ရပါတယ်။ ပြောချင်သလောက် ပြောနိုင်ပါတယ်”
“ကောင်းပြီ၊ ဒီလိုဆိုရင် ကျနော့်ကို မှတ်စရာ စာရွက်နဲ့ ခဲတံ ပေးပါ၊ မေ့မသွားခင် မှတ်တေးထားပြီးမှ ပြန်ပြောချင်တယ်။ ဖြစ်မလား?”
“ကျနော်တို့ကလည်း အဲဒီလို အပြန်အလှန်ဆွေးနွေးချင်တာပါ” … လို့ပြောပြီး ဘခက်က သူ့ အိတ်ထောင်ထဲက ဘောပင်တချောင်းထုတ်ပေးရင်း တင်ရှိန်ဘက်လှည့်ကာ “စာရွက်ပေးလိုက်ပါ” … လို့ လှမ်းပြောပါတယ်။ ( သြ … သူက အထက်ကပါလား)
တင်ရှိန် စာရွက်လာချစဉ် ဘခက်ပေးတဲ့ ဘောပင်လေးကို လှည့်ပတ်ကြည့်နေမိပါတယ်။ Lotus … တဲ့။ ဒီစဉ်က (၇၂ ခုနှစ် ဖြစ်မယ်) ဘောပင်ကို ကျယ်ကျယ်ပြန့်ပြန့် သုံးသေးဟန် မတူ။ (သုံးရင်လည်း ထောင်ထဲ ၆ နှစ်လောက် ရောက်နေသူ တယောက်အနေနဲ့ မတွေ့ မသိ။)
ဒါကြောင့် စိတ်ဝင်စားပြီး ခုအထိ မှတ်မိနေသလား၊ နောက်တခုကထောင်ထဲမှာ ခဲတံ၊ ဖောင်တိန်ဆိုတာ ရတနာ ပါ၊ ဒါကြောင့် စွဲထင်သွားသလား မပြောတတ်။ ဘခက်က စကားဆက်ကို ပြန်ကောက်ပါတယ်။
“ပထမ အသုတ်ထဲ ခင်ဗျားပါမသွားတာက ခင်ဗျားဖြေလိုက်တဲ့ ၁၁ ချက်ထဲက အဖြေတွေကြောင့်ပဲ။ ခင်ဗျားက တော်လှန်ရေးကောင်စီနဲ့ မြန်မာ့ဆိုရှယ်လစ်လမ်းစဉ်ကို ရစရာမရှိအောင် အပြစ်တင်ထားတယ်။ ကွန်မြူနစ်ပါတီ ကိုကျတော့ အရင်အတိုင်း အကဲဖြတ်ထားတာ တွေ့ရတယ်။ နောက် တရုတ်ပါတီနဲ့ ယဉ်ကျေးမှုတော်လှန်ရေး ကိုလည်း ထောက်ခံတယ် ပြောတယ်။ ဒီတော့ တရုတ်ပါတီ CPC နဲ့ CPB ဆက်ဆံရေးအတွင်းပိုင်း အခြေအနေ တွေ အာဏာလုပွဲအကြောင်းတွေကို ကိုတင်ရှိန်က စ, မိတ်ဆက်ပေးလိုက်ပါဗျာ”
ဆက်လက်ဖော်ပြပါမယ်။
No comments:
Post a Comment