ပြီးခဲ့တဲ့ ရက်ပိုင်းက အကျဉ်းထောင်တွေကနေ ပြန်လွတ်လာတဲ့ ၈၈ မျိုးဆက် ကျောင်းသားတွေက ရန်ကုန်မြို့ တော်ဝင်စင်တာမှာ သတင်းစာရှင်းလင်းပွဲပြုလုပ်ပြီး သူတို့ရဲ့ အချက် ၉ ချက်ပါ သဘောထားကြေညာချက်ကို ဒီကနေ့ ထုတ်ပြန်ခဲ့ပါတယ်။
အဲဒီထုတ်ပြန်ချက်ထဲမှာ ရွေးကောက်ပွဲဝင်မယ့် ဒေါ်အောင်ဆန်းစုကြည်ရဲ့ဆုံးဖြတ်ချက်ကို ထောက်ခံကြောင်းနဲ့ ဒေါ်အောင်ဆန်းစုကြည်ရဲ့လုပ်ဆောင်ချက်တွေကို ၈၈ မျိုးဆက်ကျောင်းသားတွေအနေနဲ့ ပံ့ပိုးကူညီဆောင်ရွက်သွားမယ် လို့ ဖော်ပြထားပြီး ပြည်တွင်းငြိမ်းချမ်းရေးအတွက် အမျိုးသားအင်အားစုအားလုံးနဲ့ လက်တွဲသွားမယ်လို့လည်း ဖော်ပြထားပါတယ်။
၈၈ မျိုးဆက် ကျောင်းသားများအဖွဲ့ ခေါင်းဆောင်တွေအကြား ပါတီ ထောင်သင့်/ မထောင်သင့် ကိစ္စနဲ့ပတ်သက်ပြီး အကြိတ်အနယ် ဆွေးနွေေးခဲ့ပေမယ့် လောလောဆယ် မဆုံးဖြတ်ရသေးကြောင်းနဲ့ နိုင်ငံရေးပုံသဏ္ဍာန်နဲ့ ဆက်ပြီးဆောင်ရွက်သွားမယ့် အင်အားစုတွေက ဒီကိစ္စကို ဆုံးဖြတ်ကြမှာဖြစ်ကြောင်း အဖွဲ့ခေါင်းဆောင်တဦးဖြစ်တဲ့ ကိုကိုကြီးက ဘီဘီစီကို ပြောပါတယ်။
၈၈ မျိုးဆက် ကျောင်းသားအင်အားစုထဲမှာ နိုင်ငံရေးကို ထဲထဲဝင်ဝင် ဆောင်ရွက်ချင်သူတွေရှိနေသလို လူထုအခြေပြု အဖွဲ့အစည်းကနေ လူမှုရေးကိစ္စရပ်တွေကို အသားပေး ဆောင်ရွက်သွားချင်သူတွေလည်း ရှိနေတယ်လို့ ဆိုပါတယ်။
မြစ်ဆုံဆည်ကိစ္စလိုမျိုး ပြည်သူတွေရဲ့လိုလားချက်တွေကို တိုက်ရိုက်ဆန္ဒဖော်ထုတ်တဲ့ လှုပ်ရှားမှုအမျိုးမျိုးနဲ့ ခွဲဖြာ လုပ်သွားဖို့ ရှိနေကြောင်း၊ ဒါပေမယ့် ၈၈ မျိုးဆက် ကျောင်းသားတွေအားလုံးအနေနဲ့တော့ မပြီးဆုံးသေးတဲ့ ခရီးကို တစုတစည်းထဲ လျှောက်လှမ်းသွားကြမှာဖြစ်ကြောင်း ကိုကိုကြီးက ပြောပါတယ်။
အရင်ကထက်စာရင် အခုလို သတင်းစာရှင်းလင်းပွဲလုပ်ခွင့်ရတာကိုက လက်ရှိ မြန်မာ့နိုင်ငံရေး အခင်းအကျင်းမှာ တိုးတက်မှုတခုလို့ ပြောနိုင်ပြီး ဒီလိုပွင့်လင်းလာတဲ့အချိန်မှာ နိုင်ငံရေးလုပ်ငန်းဆောင်တာတွေကို အရင်ကထက် ပိုပြီး လုပ်နိုင်ဖို့ မျှော်လင့်တယ်လို့လည်း ၈၈ မျိုးဆက် ကျောင်းသား ခေါင်းဆောင်တဦးဖြစ်တဲ့ ကိုကိုကြီးက ဘီဘီစီကို ပြောပါတယ်။
သတင်း - ဘီဘီစီ
ဓာတ်ပုံ - Getty images
No comments:
Post a Comment