အဆိုပါ မွေးနေ့ပွဲ အခမ်းအနားသို့ ဒေါ်အောင်ဆန်းစုကြည်၊ ဦးသူရ(ခေါ်) ဇာဂနာ အပါအဝင် ဝါရင့်နိုင်ငံရေးသမားများ၊ တိုင်းရင်းသားကိုယ်စားလှယ်၊ ၈၈ မျိုးဆက်ကျောင်းသားများ၊ နိုင်ငံရေးပါတီအချို့မှ တာဝန်ရှိသူများ၊ သတင်းစာဆရာများနှင့်အတူ ရဟန်းရှင်လူ ပြည်သူ အများအပြား တက်ရောက်ခဲ့ကြပါသည်။ မွေးနေ့ပွဲအခမ်းအနားကို သမိုင်း မြို့မဘုန်းတော်ကြီးကျောင်းရှိ အသောကဖောင်ဒေးရှင်းတွင် ကျင်းပခဲ့ခြင်းဖြစ်ကာ အစီအစဉ်များကို အောက်တိုဘာလ ၁၈ ရက်နေ့ နံနက် ကိုးနာရီအချိန်ကပင် စတင်ခဲ့ခြင်းဖြစ်ပါသည်။
ကိုမင်းကိုနိုင်၏ မွေးနေ့ပွဲအခမ်းအနားသို့ တက်ရောက်လာခဲ့သော ဒေါ်အောင်ဆန်းစုကြည်သည် သမိုင်း မြို့မကျောင်းဆရာတော်ထံသို့ သွားရောက်ဖူးမျှော်ကာ ကထိန်သင်္ကန်း ဆပ်ကပ်လှူးဒါန်းခြင်း၊ အခမ်းအနားအဖွင့် မိုးပျံပူဖောင်းများ လွှတ်တင်ပေးခြင်း၊ ငြိမ်းချမ်းရေး သင်္ကေတ ချိုးငှက်များလွှတ်ပေးခြင်းတို့ကို ပြုလုပ်ခဲ့ကာ ကိုမင်းကိုနိုင်အတွက် အမှတ်တရစကားကိုလည်း ပြောကြားပေးခဲ့ပါသည်။
ထို့နောက် ကိုမင်းကိုနိုင်၏ မွေးနေ့အတွက် ၈၈ မျိုးဆက်ကျောင်းသားများ၏ သဝဏ်လွှာကို ဖတ်ကြားခဲ့ပြီး ချင်းအမျိုးသားပါတီမှ ဦးဇိုဇမ်က လည်းကောင်း၊ မကြာမီရက်ပိုင်းက မော်လမြိုင်ထောင်မှ လွတ်မြောက်လာသော မဖြိုးဖြိုးအောင်ကလည်းကောင်း အမှတ်တရ စကားများပြောကြားခဲ့ပြီး မြစ်ကြီးနားအကျဉ်းထောင်မှ လွတ်မြောက်လာသည့် ဦးသူရ (ခေါ်) ဇာဂနာကလည်း အမှတ်တရ စကားပြောကြားခဲ့ပါသည်။
“မင်းကိုနိုင်ဆိုတာ ဘယ်လိုလူမျိုးလဲ၊ ပြောနေကြတာပါပဲ။ ကျွန်တော်ကတော့ ထောင်ထဲမှာ သူနဲ့ ကျွန်တော် အခန်းချင်းကပ်လျက် လေးနှစ်လုံးလုံး နေခဲ့ရတယ်။ သူ့အဖေက ကျွန်တော့် အဖေပဲ၊ သူ့အမေ ကျွန်တော့် အမေပဲ။ ကျွန်တော့်အဖေနဲ့အမေ ကျွန်တော်ထောင်ထဲမှာ သေသွားပေမယ့် ကျွန်တော့် အဖေ၊ အမေ ကျန်သေးသလို ခံစားရတယ်။ ဒါ ကျွန်တော့် အဖေ၊ ကျွန်တော့် အမေပါ။ သူနဲ့ ကျွန်တော်နဲ့ အဲဒီလို သံတိုင်ကြားထဲကနေ ညဘက် တစ်ည မိုးကောင်ကင်ကို မော့ကြည့်ကြ၊ သူ့ကိုလည်း ကျွန်တော်မမြင်ရ၊ ကျွန်တော့်ကိုလည်း သူ မတွေ့ရနဲ့၊ ဒါပေမယ့် အသံလေးတော့ ကြားနေရတယ်။ သူပြောတဲ့ စကားလုံးတွေက ကဗျာတစ်ပုဒ်ဖြစ်တယ်။ အဲကဗျာဟာ မင်းကိုနိုင် ဖြစ်တယ်ဆိုတာကို နားထောင်ကြည့်ပေးပါ။
“လရောင်အောက်မှာနေ၊ လကိုလေ မမြင်ရ၊ ငါ ဘယ်ရောက်နေတာလဲ၊ ပါဝင်ခွင့်မရတဲ့ လောကမှာ သတိရရုံလေးပါပဲ”။ မင်းကိုနိုင်ပါ။ အဲဒီလိုလေးတွေ သတိရနေတဲ့ အချိန်လေးပဲလား။ မဟုတ်သေးပါဘူး။ နောက်တစ်ပုဒ် သီချင်းလေးဆိုတယ်။ သီချင်းလေး ရေးတယ်။ မင်းကိုနိုင်ရဲ့သီချင်းဟာ ကျွန်တော် အသံဝင်နေလို့၊ မဟုတ်ရင်တော့ ကျွန်တော်ဆိုပြလို့ ရတယ်။ ဒါပေမဲ့ အဲဒီသီချင်းရဲ့ သံပြိုင်ပိုဒ်ကလေးက ဘာလဲ၊ မင်းကိုနိုင်ဘာလဲ သိစေချင်တယ်။ အဲတာ ဘာလဲလို့ဆိုတော့ “အာဃာတ တရား၊ အငြိုးများ ပျောက်ကွယ်စေ၊ ချိုးဖြူငှက်ရဲ့ သီချင်းများ သာယာသည်၊ ခိုင်မာခြင်း၊ ညီညာခြင်း မြန်မာဆိုတဲ့ မူရင်း အဓိပ္ပာယ် အမြဲပေါ်လွင်သည်” အဲတာ မင်းကိုနိုင်ရဲ့ သံပြိုင်ပိုဒ်ပါ။ မင်းကိုနိုင်ရဲ့ သံပြိုင်ပိုဒ်ပါ။ ခိုင်မာခြင်းနဲ့ ညီညာခြင်းကို အမြဲလိုချင်တဲ့ ကျွန်တော့် သူငယ်ချင်းကို သမ္မတကြီးခင်ဗျာ ... ဒီကနေ့ မွေးနေ့လက်ဆောင် အဖြစ်နဲ့ ပြန်လွှတ်ပေးပါ” ဟု ဦးသူရ (ခေါ်) ဇာဂနာက အမှတ်တရစကား ပြောကြားခဲ့ပါသည်။
ယခုပြုလုပ်ခဲ့သော ကိုမင်းကိုနိုင် မွေးနေ့ပွဲအခမ်းအနားကို ယုံကြည်ချက်ကြောင့် အကျဉ်းကျနေသူများ၊ အကျဉ်းကျခံရသည့် ပုဂ္ဂိုလ်များများကို သတိတရရှိပြီး ၎င်းတို့နှင့် တစ်သားတည်းရှိကြောင်းကို ပြသလိုသည့် ရည်ရွယ်ချက်၊ ငြိမ်းချမ်းမှု၊ လွတ်လပ်မှု၊ တရားမျှတမှုအတွက် ကျောင်းသားထု၏ ဒီမိုကရေစီရေး ကြိုးပမ်းမှုအဆက်ဆက်ကို ဂုဏ်ပြုလိုသည့် ရည်ရွယ်ချက်၊ ယုံကြည်ချက်ကြောင့် အကျဉ်းကျခံနေရသော နိုင်ငံရေး အကျဉ်းသားများအား ချွင်းချက်မရှိ အမြန်ဆုံးပြန်လည် လွတ်မြောက်လာစေချင်သော ရည်ရွယ်ချက် အစရှိသော ရည်ရွယ်ချက်များဖြင့် ကျင်းပခဲ့ခြင်း ဖြစ်ပါသည်။
“လူငယ်တွေလည်း လူကြီးဘဝသို့ ရောက်ခဲ့ကြပါပြီ။ ပြည်ထောင်စုကြီးလည်း ချမ်းသာအေးချမ်းရန် အချိန်ရောက်ရှိနေပါပြီ။ ပြည်သူပြည်သားအားလုံး ညီညီညွတ်ညွတ်နှင့် ကိုမင်းကိုနိုင် အပါအဝင် နိုင်ငံသားအကျဉ်းကျ အားလုံးကို သတိတရနှင့် တိုင်းပြည်အကျိုးဆောင်ရွက်နိုင်ကြပါစေ” ဟု ဒေါ်အောင်ဆန်းစုကြည်က ကိုမင်းကိုနိုင်မွေးနေ့ အမှတ်တရစာအုပ်၌ ရေးသားထားခဲ့ပါသည်။
ကိုမင်းကိုနိုင်သည် ၁၉၆၂ ခုနှစ်တွင် မွေးဖွားခဲ့သူဖြစ်ပြီး အမည်ရင်းမှာ ပေါ်ဦးထွန်း ဖြစ်ပါသည်။ ဘဝတစ်လျှောက် ထောင်ဒဏ် နှစ် ၂၀ ကျော် ကျခံခဲ့ရပြီး ၂၀၀၇ ခုနှစ် သြဂုတ်လအတွင်းက ထပ်မံ အဖမ်းခံခဲ့ရပြီးနောက် ထောင်ဒဏ် ၆၅ နှစ်ကျခံခဲ့ရကာ လက်ရှိအချိန်တွင် ကျိုင်းတုံအကျဉ်းထောင်သို့ ရောက်ရှိနေခဲ့ပါသည်။
ကိုမင်းကိုနိုင်၏ ၄၉ နှစ်ပြည့် မွေးနေ့အခမ်းအနား၌ ဒေါ်အောင်ဆန်းစုကြည် ပြောဆိုခဲ့သော အမှတ်တရစကား။
“ကိုမင်းကိုနိုင်ရဲ့ မွေးနေ့မှာ ကိုမင်းကိုနိုင်ရဲ့ မိသားစုကို ဂုဏ်ပြုချင်ပါတယ်။ ဒီလိုသားတစ်ယောက်ကို ဒီလောက် နှစ်ပေါင်းများစွာ ထောက်ပံ့ခဲ့တာ၊ ထောက်ခံခဲ့တာ ပြုစုပျိုးထောင် ပေးတာတွေအတွက် မိသားစုကို ပထမဆုံး ကျေးဇူးတင်တယ်လို့ ပြောပါရစေ။
ကျွန်မတို့ နောက်ပြောချင်တာကတော့ ဒီကနေ့ဟာ နိုင်ငံရေးအကျဉ်းသားများအားလုံး လွတ်မြောက်ရေးကို ဦးတည်ပြီးတော့ ကျင်းပတဲ့နေ့တစ်ခု ဖြစ်ပါတယ်။ လွတ်မြောက်ရေးကို ဦးတည်ပြီးတော့ ကျင်းပတဲ့နေ့တစ်နေ့ပေါ့။ စဉ်းစားကြည့်ပါတယ်။ လွတ်မြောက်ရေးဆိုတာ ဘာလဲပေါ့။ အားလုံးအတွက် အရေးကြီးဆုံးလို့ ကျွန်မ ထင်တာကတော့ အဂတိတရားလေးပါးမှ လွတ်မြောက်ရမယ်။ အားလုံးဟာ အဂတိတရား လေးပါးကနေ လွတ်မြောက်သွားပြီဆိုလို့ရှိရင် လူတိုင်း လူတိုင်းဟာ တကယ်ကို လွတ်မြောက်နေတာပဲ။ ထောင်ထဲမှာ ရှိသည်ဖြစ်စေ၊ ထောင်ပြင်မှာ ရှိသည်ဖြစ်စေ ဘယ်မှာပဲရှိရှိ တိုင်းပြည်တစ်ပြည်လုံးဟာ အဂတိတရားလေးပါးကနေ ကင်းလွတ်ပြီဆိုလို့ရှိရင် ဒီနိုင်ငံဟာ တကယ် လွတ်လပ်တဲ့ နိုင်ငံဖြစ်သွားပြီ။ ဒီလိုအခြေအနေမျိုး ရောက်အောင်လို့ အားလုံးဝိုင်းပြီးတော့ ကြိုးစားရမယ်။ တစ်ဦးချင်း တစ်ဦးချင်းက ကြိုးစားရမယ်။ တစ်ဦးချင်း တစ်ဦးချင်းက အဂတိတရားလေးပါးကနေ ကင်းလွတ်ရမယ်။
တစ်ချို့က အဂတိတရားလေးပါးလို့ဆိုလို့ရှိရင် အလုပ်နဲ့သက်ဆိုင်တယ်လို့ပဲ ထင်ကြတယ်။ ဥပမာအားဖြင့်ဆိုရင် လာဘ်ပေးလာဘ်ယူပေါ့လေ။ ဒီလို လွယ်လွယ်တွေးကြတယ်။ တကယ်စဉ်းစားကြည့်လို့ရှိရင် ဒါထက် အများကြီး ကျယ်ပြန့်ပါတယ်။ ဆန္ဒာဂတိပေါ့နော်။ ကိုယ့်ဆန္ဒအရ မလုပ်ရဘူးပေါ့။ ကိုယ့်ဆန္ဒစွဲအရ မလုပ်ရဘူး။ ကြာကြာ စဉ်းစားရမယ်။ အလုပ်တစ်ခုကို ကိုယ်လုပ်လို့ရှိရင် တကယ်မှန်တယ်ထင်လို့ လုပ်တာလား။ ကိုယ်လုပ်ချင်လို့ လုပ်တာလား။ ဒီလိုဟာကို သုံးသပ်တဲ့နေရာမှာ အင်မတန်မှ ဖြောင့်မတ်ဖို့လိုတယ်။ ကိုယ့်ကိုကိုယ် မလှည့်ဖျားဖို့လိုတယ်။ လူများကို လှည့်ဖျားတာက ဒုတိယလာတာ။ ပထမဦးဆုံးက ကိုယ့်ကိုကိုယ် မလှည့်ဖျားရဘူး။ ဒီကိစ္စတစ်ခုကို ကိုယ်လုပ်ချင်တာ ကိုယ့်အတွက်လား။ အများအတွက်လား။ အမှန်တရားအတွက်လား။ ဒါကိုသေသေချာချာ သုံးသပ်မှ ဆန္ဒာဂတိကနေ ကင်းမှာဖြစ်တယ်။ လောဘဂတိကတော့ ရှည်ရှည်ဝေးဝေး ပြောနေစရာမလိုပါဘူး။ အားလုံးနားလည်ပါတယ်။ လောဘဆိုတာ လူတိုင်းရှိတာပဲ။ ကျွန်မတို့လည်း ရှိတာပဲ။ ဒါပေမဲ့ ဒါဟာ အထိန်းအကွပ်ရှိရမယ်။ သူ့စည်းနဲ့သူ ရှိရမယ်။
လွန်ပြီးတော့ ကိုယ်ရသင့်ရထိုက်တာထက် ပိုပြီးတော့ လိုချင်တဲ့ လောဘဆိုလို့ရှိရင်တော့ ဒါအများကို ထိတဲ့ လောဘမျိုးဖြစ်သွားနိုင်တယ်။ အဲတာကို အားလုံးကနေပြီးတော့ ဆင်ခြင်ရမယ်ဆိုတာ ကျွန်မထူးထူးထွေထွေ ပြောဖို့ မလိုပါဘူး။ ဘယာဂတိအကြောင်း အမြဲပဲ ပြောလေ့ရှိပါတယ်။ ကြောက်ခြင်းတရားပေါ့နော်။ ကြောက်တဲ့စိတ်ဟာ ကိုယ့်ကိုလွှမ်းမိုးနေလို့ရှိလို့ရှိရင် အမှန်ကို မလုပ်နိုင်ဘူးဆိုတာ။ ဒါကြောင့်မို့ ကျွန်မတို့ကနေပြီးတော့ စိုးရိမ်ကြောင့်ကြမှုကနေ လွတ်ကင်းအောင် ကိုယ့်ကိုကိုယ်လုပ်ရမယ်လို့ ပြောတာပါ။ ဒီတော့ စိုးရိမ်ကြောင့်ကြမှုကနေ လွတ်ကင်းအောင်လုပ်ဖို့ဆိုတာ လွယ်တဲ့ ကိစ္စမဟုတ်ပါဘူး။ ဒါဟာ ထပ်တလဲလဲ ကျင့်ပြီးတော့ ယူရပါတယ်။ အဲဒီလိုပြောခြင်းအားဖြင့် မွေးကတည်းက မကြောက်တတ်တဲ့စိတ် ပါတာကို ပြောတာမဟုတ်ပါဘူး။ ကိုယ့်ကိုယ်ကို ကိုယ်ကြောက်လို့ရှိရင်တောင် ကြောက်တာကြောင့်မလို့ မမှန်တဲ့ကိစ္စကို မလုပ်ဖို့ ဒါပါပဲ။ ကျွန်မ အမြဲပဲ ပြောတယ်။ ကြောက်ကြောက်နဲ့ ငြင်းပါ။ မလုပ်သင့်တဲ့ကိစ္စကို ကြောက်ကြောက်နဲ့ပဲ မလုပ်ဘူးဆိုပြီးတော့ ငြင်းပါ။ လုပ်သင့်တဲ့ ကိစ္စကိုလည်း ကြောက်ကြောက်နဲ့ပဲ လုပ်ပါ။ လုပ်လို့ရှိရင် ဒါဟာ အရေးကြီးတာပဲ။ အမှန်ကို လုပ်ရမယ်။ မမှန်တဲ့ ကိစ္စကို ရှောင်ရမယ်။ ဒါဟာ ကြောက်လို့ မလုပ်ဖြစ်ပါဘူး၊ ကြောက်လို့ လုပ်လိုက်တာပါ။ ဒါဟာ လူတိုင်းမှာ ဖြစ်တတ်ပါတယ်။
ဖြစ်ပြီးရင် ပျက်ပေမယ့်လည်း ထပ်တလဲလဲ ကြုံရပါတယ်။ တစ်ခါလုပ်လို့ မအောင်မြင်ရင်လည်း နောက်နှစ်ခါ ထပ်ကြိုးစားပါ။ နှစ်ခါလုပ်လို့ မအောင်မြင်လည်း ထပ်တလဲလဲ ကြိုးစားပါ။ ကြိုးစားသင့်တဲ့ ကိစ္စဆိုတာဟာ ဘယ်လောက် ဘယ်နှစ်ခါပဲ ကြိုးစားရ ကြိုးစားရ ကြိုးစာရနပ်ပါတယ်။ နောက်ပြီးတော့ ဒေါသဂတိပေါ့နော်။ ကိုယ်မကြိုက်လို့ ကိုယ်မုန်းလို့
အဲဒီလိုကြောင့်မို့ လုပ်တဲ့ကိစ္စတွေဟာလည်း ဒါဟာ အမှန်တရားနဲ့ မကိုက်ညီပါဘူး။ လူတစ်ယောက်ကို မုန်းလို့လုပ်တာပဲ ဖြစ်စေ၊ အဖွဲ့အစည်းတစ်ခုကို မုန်းလို့ပဲ လုပ်တာပဲဖြစ်စေ၊ ဒေါသဆိုတာ မကျေနပ်ချက်ကြောင့်ပဲ ဖြစ်စေ၊ အဲတာတွေကလည်း ကျွန်မတို့ ရှောင်ဖို့လိုပါတယ်။ ဘာပဲပြောပြော အဂတိတရားလေးပါးကို ကင်းတယ်ဆိုလို့ရှိရင် မမှန်တဲ့လမ်းကို မရောက်သွားဘူးပေါ့။ မှန်ကန်တဲ့လမ်းပေါ်မှာ လျှောက်သွားနိုင်တယ်။
မှန်ကန်တဲ့လမ်းဆိုတာ အမြဲပဲ ဖြူးဖြူးဖြောင့်ဖြောင့် မဟုတ်ပါဘူး။ အင်မတန်မှလည်း အန္တရာယ်များနိုင်တယ်။ အင်မတန်မှလည်း ပင်ပန်းနိုင်တယ်။ ဒါပေမဲ့ လျှောက်ရကျိုးနပ်တယ်လို့ ကျွန်မ ပြောပါရစေ။ အဂတိတရား လေးပါးကနေ လွတ်ကင်းပြီဆိုလို့ရှိရင် ထောင်ထဲမှာလည်း သူဟာ လွတ်လပ်နေတာပဲ။ ထောင်ပြင်မှာလည်း လွတ်လပ်နေတာပဲ။ အဂတိတရားလေးပါး မကင်းဘူးဆိုလို့ရှိရင် အပြင်မှာလည်း မလွတ်လပ်ဘူး။ အတွင်းမှာလည်း မလွတ်လပ်ဘူး။
ဘယ်တော့မှ လွတ်လပ်မှာ မဟုတ်ပါဘူး။ ဒါဟာ ကျွန်မတို့ဟာ ကျွန်မတို့ရဲ့ နိုင်ငံရေးအကျဉ်းသားများ လွတ်မြောက်ရေး အတွက် ကြိုးပမ်းတဲ့ ဒီလိုနေ့မျိုးမှာဆိုလို့ရှိရင် ကိုယ့်ကိုယ်ကိုလည်း ပြန်ပြီးတော့ သုံးသပ်ဖို့လည်း လိုပါတယ်။ ကိုယ်ကိုယ်တိုင်ကရော လွတ်မြောက်နေရဲ့လား။ ကိုယ်ကိုယ်တိုင်က လွတ်မြောက်နေရဲ့လားဆိုတာ အပြင်အနှောင်အဖွဲ့တွေကို ကျွန်မ ပြောတာ မဟုတ်ပါဘူး။ ပထမဆုံး အဂတိတရား လေးပါးဆိုတဲ့ ကိုယ့်ရဲ့ ကိုယ်တွင်း အနှောင်အဖွဲ့တွေကနေ လွတ်မြောက်နေရဲ့လားဆိုတာ ပထမသုံးသပ်ဖို့ လိုပါတယ်။ အဲတာတွေကနေ လွတ်မြောက်နေဖို့ ပထမဦးဆုံး ကြိုးစားပါ။ ကြိုးစားမှ ပြင်ပ အနှောင်အဖွဲ့တွေကနေပြီးတော့ လွတ်မြောက်ဖို့ ကြိုးစားနေတဲ့အခါမှာ အမှားမပါမှာ ဖြစ်ပါတယ်။ ကျွန်မတို့ရဲ့ လူငယ်တွေတော်တော်များများဟာ အခုထိ အကျဉ်းသားဘဝကနေ မလွတ်မြောက်သေးပါဘူး။ ဒါ လွတ်မြောက်ဖို့အတွက်လည်း ကျွန်မတို့ ဆက်ပြီးတော့ ကြိုးစားသွားမှာပါ။ နိုင်ငံရေးအကျဉ်းသားများ ဘာဖြစ်လို့ လွတ်မြောက်စေချင်လဲဆိုရင် ကျွန်မတို့နိုင်ငံဟာ တကယ်ကိုလွတ်မြောက်တဲ့ တိုင်းပြည်ဖြစ်စေချင်လို့၊ ကျွန်မတို့နိုင်ငံဟာ တကယ်ကို အဂတိတရားလေးပါးကနေ ကင်းလွတ်တဲ့ တိုင်းပြည်ဖြစ်စေချင်လို့၊ ဒါကြောင့်မို့ အကျဉ်းမချသင့်တဲ့သူတွေကို မချတာကလည်း အဂတိတရားကနေ ကင်းလွတ်တဲ့အထဲ ပါပါတယ်။ ဒါကြောင့်မို့ ကျွန်မတို့ကနေ လွှတ်သင့်တဲ့သူတွေကို လွှတ်ရမယ်။ လုပ်သင့်တဲ့ ကိစ္စကို လုပ်ရမယ်ဆိုပြီးတော့ ဒါကို ကျွန်မတို့က ဦးတည်ပြီးတော့ ပြောနေတာ ဖြစ်ပါတယ်။
လူတိုင်း လူတိုင်းရဲ့ လွတ်လပ်ပိုင်ခွင့် လူတိုင်း လူတိုင်းရဲ့ မိမိဘဝကို ထူထောင်ပိုင်ခွင့်အတွက် ကျွန်မတို့ဟာ ဒီမိုကရေစီ လှုပ်ရှားမှုထဲကို ဝင်လာတာပါ။ ဒီတော့ အခွင့်အရေး အကြောင်းကြီးပဲ ကျွန်မ အမြဲပြောတာ မဟုတ်ပါဘူး။ အခွင့်အရေးအကြောင်းပြောရင် အမြဲပဲ တာဝန်အကြောင်းကို တစ်ခါတည်းဆက်ပြီး ပြောပါတယ်။ အခွင့်အရေးရှိသလို တာဝန်ဆိုတာလည်း ရှိရမယ်။ ကိုယ့်တာဝန်ကို ကိုယ်အလေးမထားနိုင်လို့ရှိလို့ရှိရင် တကယ်တော့ လူများရဲ့ လွတ်လပ်မှုကို အလေးမထားတာနဲ့ အတူတူပဲ။ လူများရဲ့ လွတ်လပ်မှုကို အလေးမထားတဲ့သူတွေဟာ ဘာဖြစ်လို့ ကိုယ့်လွတ်လပ်မှုကို တောင်းဆိုပိုင်ခွင့်ရှိလဲ။ မရှိဘူး။ ဒါဟာ မတရားဘူး။ တာဝန်ယူနိုင်တဲ့ စိတ်၊ တာဝန် ထိန်းသိမ်းရဲတဲ့ စိတ်ဓာတ်ရှိမှ လွတ်လပ်ခြင်းကို တောင်းနိုင်တဲ့ အခွင့်အရေးရှိတယ်လို့ ကျွန်မ ဒီလိုပဲ ယူဆပါတယ်။ အဲတာကြောင့်မို့လို့ ကျွန်မတို့ရဲ့ လူငယ်တွေ၊ လူလတ်တွေ၊ လူကြီးတွေ၊ လူငယ်တွေလို့ အခုပြောပေမယ့် ကျွန်မတို့လူငယ်တွေကလည်း လူကြီးတွေဖြစ်လာပြီ။ ကျွန်မတို့လူကြီးတွေကလည်း အကြီးကြီးတွေ ဖြစ်လာပြီ။ အဲလို တစ်ဆင့် တစ်ဆင့် ပြောင်းလာတဲ့ အခြေအနေမှာ ကျွန်မတို့အားလုံးဟာ အဂတိတရားနဲ့ကင်းဖို့ဆိုတာ ဘယ်အရွယ်နဲ့မှ မဆိုင်သူ မရှိဘူး။ အရွယ်တိုင်းနဲ့ ဆိုင်တယ်။ အဲတာကြောင့်မို့လို့ ဒီဟာအတွက် ဒီလွတ်မြောက်ရေးအတွက် ဝိုင်းပြီးတော့ ကြိုးစားသွားကြပါ။ လွတ်မြောက်ရေးဆိုတာ အမျိုးမျိုးရှိပါတယ်။ လွတ်လပ်ရေး လွတ်မြောက်ရေးအကြောင်း ပြောမယ်ဆိုလို့ရှိရင် တစ်နေကုန်လည်း ပြောလို့ပြီးမှာ မဟုတ်ပါဘူး။ နိဂုံးချုပ်အနေနဲ့ပြောချင်တာက ကိုမင်းကိုနိုင်နဲ့တစ်ကွ နိုင်ငံရေးအကျဉ်းသားများအားလုံး အမြန်ဆုံးလွတ်မြောက်ပါစေ။ ကျွန်မတို့နိုင်ငံ တစ်နိုင်ငံလုံး ပြည်သူ ပြည်သားအားလုံး ညီညီညွတ်ညွတ်နဲ့ အဂတိတရား လေးပါးကနေပြီးတော့ လွတ်မြောက်တဲ့ဘဝကို ရောက်နိုင်ကြပါစေလို့ ကျွန်မအနေနဲ့ ဆုတောင်းလိုက်ပါတယ်”
သတင်း - Eleven Media Group
Photos: AP, Reuters, Getty Images
No comments:
Post a Comment