ဒေါ်အောင်ဆန်းစုကြည်နဲ့ အစိုးရသစ်တို့ ပထမဆုံး တွေ့ဆုံပြီ

မြန်မာ့ဒီမိုကရေစီရေး လှုပ်ရှားမှုခေါင်းဆောင် ဒေါ်အောင်ဆန်းစုကြည်နဲ့ မြန်မာအစိုးရ ကိုယ်စားလှယ် အလုပ်သမားဝန်ကြီး ဦးအောင်ကြည်တို့ တနင်္လာနေ့ မွန်းလွဲပိုင်းက ရန်ကုန် စိမ်းလဲ့ကန်သာ အစိုးရ ဧည့်ရိပ်သာမှာ ၁ နာရီကျော်ကြာ တွေ့ဆုံခဲ့ကြပါတယ်။

 

 အစိုးရသစ်တက်လာပြီးနောက် ဒေါ်အောင်ဆန်းစုကြည်နဲ့ အစိုးရကိုယ်စားလှယ်တို့ ပထမဆုံး တွေ့ဆုံကြတာလည်း ဖြစ်ပါတယ်။

 

အစည်းအဝေးအပြီး ဝန်ကြီး ဦးအောင်ကြည်က ပူးတွဲကြေငြာချက်ကို ဖတ်ပြရာမှာ “ပြည်သူလူထု ကိုယ်စိတ်နှစ်ပါး ချမ်းသာစေရေးအတွက် နှစ်ဖက် ပူးပေါင်းဆောင်ရွက်နိုင်မည့် အခွင့်အလမ်းများကို ဆွေးနွေးခဲ့ကြပါသည်” လို့ ပြောပါတယ်။

အဲဒီဆွေးနွေးချက်တွေထဲမှာ တရားဥပဒေစိုးမိုးရေးကိစ္စ၊ စိတ်ဝမ်းကွဲပြားမှုပပျောက်ရေးကိစ္စ နဲ့ အများပြည်သူ အကျိုးဖြစ်ထွန်းစေမယ့် ကိစ္စရပ်တွေကိုလည်း ဆွေးနွေးခဲ့ကြတယ်လို့ ပူးတွဲ ကြေငြာချက်မှာ ဖော်ပြပါတယ်။

ဒီအစည်းအဝေးအပေါ် နှစ်ဖက်စလုံးက ကျေနပ်အားရမှုရှိကြပြီး နောက်ထပ်လည်း ထပ်မံ တွေ့ဆုံ ဆွေးနွေးဖို့ သဘောတူကြတယ်လို့လည်း ကြေငြာချက်မှာ ဖော်ပြပါတယ်။

စိမ်းလဲ့ကန်သာက ဆွေးနွေးပွဲအပြီး ဦးအောင်ကြည်နဲ့ ဒေါ်အောင်ဆန်းစုကြည်တို့က ပူးတွဲ သတင်းစာရှင်းလင်းပွဲ လုပ်ရာမှာ ရန်ကုန်အခြေစိုက် နိုင်ငံခြားသတင်းဌာန သတင်းထောက်တွေနဲ့ ပြည်တွင်းက ဂျာနယ် သတင်းထောက်တွေလည်း တက်ရောက် မေးမြန်းခွင့်ရခဲ့ပါတယ်။ ဒါပေမယ့် စုစုပေါင်း မေးခွန်း သုံးခုကိုသာ မေးမြန်းခွင့် ပြုခဲ့ပါတယ်။

 

ပိုမိုပူးပေါင်းဆောင်ရွက်လို

ဦးအောင်ကြည်ဟာ ၂၀၀၇ သံဃာ့အရေးအခင်းနောက်ပိုင်းမှာ အဲဒီတုန်းက နအဖအစိုးရဘက်ကနေ ဒေါ်အောင်ဆန်းစုကြည်နဲ့ လုပ်ငန်းတွေဆောင်ရွက်နိုင်အောင်လို့ဆိုပြီး ဆက်ဆံရေးဝန်ကြီးအဖြစ် ခန့်အပ်ခံခဲ့ရသူ ဖြစ်ပါတယ်။

ဒေါ်အောင်ဆန်းစုကြည်နဲ့ ဦးအောင်ကြည်တို့ တွေ့ဆုံတာဟာ အခုအကြိမ်ဟာ ၁၀ ကြိမ်မြောက်ဖြစ်ပြီး ပြီးခဲ့တဲ့ ၉ ကြိမ်မှာတော့ ထင်ရှားမြင်သာတဲ့ ရလာဒ်တွေ မထွက်ခဲ့ဘူးလို့ နိုင်ငံရေးအကဲခတ်တွေက သုံးသပ်ကြပါတယ်။

ဒါပေမယ့် ဦးအောင်ကြည်ကတော့ ဒါကို ငြင်းဆိုခဲ့ပါတယ်။ အရင်အကြိမ်တွေတုန်းကလည်း “အထိုက်အလျောက် အကျိုးကျေးဇူး ဖြစ်ထွန်းမှု” ရှိတယ်လို့ဆိုပြီး အခုအကြိမ်မှာလည်း အရင်အကြိမ်တွေထက် ပိုမို ပူးပေါင်းဆောင်ရွက်နိုင်မယ်လို့ မျှော်လင့်ကြောင်း သတင်းထောက်တဦးရဲ့အမေးကို ဦးအောင်ကြည်က ဖြေကြားခဲ့ပါတယ်။

ဒေါ်အောင်ဆန်းစုကြည်ကလည်း “တိုင်းပြည်အတွက် အကျိုးဖြစ်စေမယ့် ရလာဒ်တွေကို မျှော်လင့်ပါတယ်” လို့ သတင်းစာရှင်းလင်းပွဲမှာ ဖြေကြားခဲ့ပါတယ်။

 

ဒေါ်အောင်ဆန်းစုကြည်နှင့် ဆက်ဆံရေးဝန်ကြီး ဦးအောင်ကြည် တွေ့ဆုံခဲ့မှုများ

၁။ ၂၀၀၇ ခုနှစ် အောက်တိုဘာလ ၂၅ ရက်
၂။ ၂၀၀၇ ခုနှစ် နိုဝင်ဘာလ ၉ ရက်
၃။ ၂၀၀၇ ခုနှစ် နိုဝင်ဘာလ ၁၉ ရက်
၎။ ၂၀၀၈ ခုနှစ် ဇန်နဝါရီလ ၁၁ ရက်
၅။ ၂၀၀၈ ခုနှစ် ဇန်နဝါရီလ ၃၀ ရက်
၆။ ၂၀၀၉ ခုနှစ် အောက်တိုဘာလ ၃ ရက်
၇။ ၂၀၀၉ ခုနှစ် အောက်တိုဘာလ ၇ ရက်
၈။ ၂၀၀၉ ခုနှစ် ဒီဇင်ဘာလ ၉ ရက်
၉။ ၂၀၁၀ ပြည့်နှစ် ဇန်နဝါရီလ ၁၅ ရက်

သတင်း - ဘီဘီစီ နှင့် Eleven Media Group

Photos: AP, Reuters, Getty Images